ЛШ, Гарсија: Јувентус не е само Дибала и Роналдо!
В петок (21.00 часот) на стадионот во Торино Лион ќе се обиде да ја одбрани предноста од 1:0 стекната на првиот меч од осминафиналето во Лигата на шампионите.
Француската екипа е свесна дека задачата ќе биде тешка, бидејќи пред себе ќе го има повеќекратниот првак на Италија, Јувентус.
– Обично кога триумфирате на првиот натпревар, имате подобри шанси да се пласирате во следната фаза, но во овој случај со оглед на силата на противникот, шансите се 50-50. Јуве има девет титули по ред во Серија А, тоа доволно кажува за неговата сила. Од друга страна, не се така солидни дефанзивно како во минатите години и ќе се обидеме да го искористиме тоа. Одиме да постигнеме гол, и доколку успееме во тоа, ќе биде полесно за нас да се најдеме во следната фаза од натпреварувањето – рече тренерот на Лион, Руди Гарсија.
За оваа возвратна пресметка во редовите на „Старата дама“ неизвесен е настапот на Пауло Дибала, кој има повреда на мускул, но секако се очекува Кристијано Роналдо да го предводи нападот.
– Јувентус не е само Дибала и Роналдо, имаат многу големи ѕвезди во составот. Па така, остануваме скромни, но и амбициозни. Целта е да се пласираме во четвртфиналето – додаде францускиот стратег.
Потсетување дека завршниот турнир од осум најдобри екипи во ЛШ (поради ситуацијата со Ковид-19) ќе се игра во еден град, Лисабон, Португалија.
Победникот од дуелот Јувентус-Лион во четвртфиналето на стадионот „Да Луж“ ќе ги одмери силите против подобриот од двомечот Манчестер сити-Реал Мадрид (2:1).