Лотито: Сите сакаат да се прекине монополот на Јувентус
Претседателот на Лацио, Клаудио Лотито е уверен дека неговиот тим има поддршка од сите неутрални навивачи во борбата за титулата во Серија А.
Лацијалите по подолго време се сериозен кандидат за титулата во Серија А бидејќи на 14. кола до крајот на сезоната имаат само еден бод негатива во однос на лидерот на табелата, Јувентус.
„Старата дама“ која осум години по ред е шампион во Серија А, сезонава има сериозни конкуренти во Лацио, но и во Интер кој заостанува само два бода во однос на лидерот.
– Вистина е дека сите сакаат да се прекине монополот на Јувентус, но и да се победи Интер. Сите кои не ги поддржуваат Јувентус и Интер, навиваат за нас. Многу навивачи на Лацио се јавија, но и многу кои не навиваат за нас – вели Лотито.
Лацијалите во последното коло во дербито го совладаа Интер со 2:1.
– Најголемото задоволство во неделата не беа пораките, туку кога влегов во соблекувалната по натпреварот. Пет или шест фудбалери ми пријдоа со голема доза на адреналин и викаа „дали видовте претседателе. Направивме како што ни кажавте“ – додава Лотито.