Аријан Адеми по историскиот успех кој го постигна со македонската репрезентација и пласманот на ЕП, реди успеси и на купски план.

Неговиот тим Динамо Загреб како гостин со 0:3 славеше против Волфсбергер и се наоѓа пред пласман во нокау фазата. Динамо Загреб е лидер на табелата во групата К со осум бода, три повеќе од Феенорд и четири од Волфсбергер и во последните два натпревари потребни му се два бода за да освои едно од првите две места и да обезбеди европска пролет.

Сите голови беа постигнати во второто полувреме, резултатот го отвори Мајер во 60. минута, а 15. минути подоцна Петковиќ по асистенцијата на Адеми зголеми на 0:2. Конечниот резултат го постави Иванушец во судиското продолжение.

На бод од пласман во нокаут фазата се наоѓа и Црвена звезда која со 0:2 славеше на гостувањето кај Гент. „Црвено-белите“ поведоа уште во втората минута преку Петровиќ, а во 58. минута Милуновиќ го постави конечниот резултат. На српскиот шампион потребен му е само бод во последните две кола за да го обезбеди второто место, а доколку Либерец не победи наредната недела, тогаш и без бод „црвено-белите“ ќе играат во нокаут фазата во Лигата на Европа.

Екипата на Лестер со голот на Варди во 95. минута се спаси од пораз на гостувањето кај Брага играјќи 3:3. Португалскиот тим преку Франсеџио во 90. минута поведе со 3:2, но Варди во последните моменти од натпреварот успеа да постигне гол и да му донесе бод на својот тим со кој си обезбеди пласман во нокаут фазата.

Во дербито, Лил и Милан одиграа без победник 1:1. „Росоњерите“ кои играа без Ибрахимовиќ поведоа преку Кастиљехо во 46. минута, но Бамба му 65. минута му донесе израмнување на францускиот тим.

Резултати:

АЕК – Зорја 0:3
Брага – Лестер 3:3
ЦСКА Москва – Феенорд 0:0
ЦСКА Софија – Јанг Бојс 0:1
Гент – Црвена звезда 0:2
Ласк – Антверпен 0:2
Либерец – Хофенхајм 0:2
Лил – Милан 1:1
Макаби Тел Авив – Виљареал 1:1
Молде – Арсенал 0:3
Карабак – Сиваспор 2:3
Спарта Прага – Селтик 4:1
Волфсбергер – Динамо Загреб 0:3