Лидерската средба траела шест часа, новинарите револтирано си заминале откако не добиле изјави
По повеќе од шест часови чекање за изјави, новинарите кои ја следеле лидерската средба синоќа си заминале од Собранието.
На лидерската средба требаше да се разговара за Законот за јавно обвинителство, но како што пренесуваат повеќе извори, и двете страни цврсто стоеле на своите позиции и затоа дури до 2.30 по полноќ не бил постигнат договор.
Револтираните новинари поради тоа што состанокот помеѓу Заев и Мицкоски трае доцна по полноќ, а никој не дава изјави и информации, сложно го напуштиле настанот.
Она што се дознава, а како што пренесува СДК.МК е дека Мицкоски побарал предистрагите, истрагите и обвиненијата поведени по 30 јуни 2017 година да запрат со изрична законска одредба која би се вметнала во Предлог-законот за јавно обвинителство. Тоа бил само еден од условите од Мицкоски за да гласа ВМРО-ДПМНЕ за законот, кој се носи со двотретинско мнозинство.
Истиот извор пренесува и дека Заев и министерката за правда Дескоска не прифаќаат таков предлог, со образложение дека опстанокот на предметите на СЈО до нивното конечно расветлување, се бенчмарк кој се очекува од Македонија да го исполни, за да може да очекува датум за почеток на преговорите за членство во ЕУ.