Германскиот опозициски лидер Фридрих Мерц денеска се сретна со претседателот на Украина Володомир Зеленски во Киев и рече дека нејзината битка против руските напаѓачи е борба во име на слободата насекаде во светот, што го зголеми притисокот врз канцеларот Олаф Шолц да се појави во главниот град на Украина, пишува Ројтерс.

Иако Германија стана меѓу најголемите добавувачи на оружје за Киев, Берлин беше критикуван дека се двоумел пред да се согласи да испрати тешко оружје и за неговата претходна поддршка за дијалогот со рускиот претседател Владимир Путин.

Мерц, лидерот на германските демохристијани кои ја загубија власта на изборите во септември минатата година, рече дека ќе го информира Шолц за неговото патување во Украина, обиколувајќи го бомбардираниот град Ирпин пред да замине во блискиот Киев на разговори со украинскиот претседател.

„Ова не се слики што ги заборавате набрзина“, рече тој за состојбата во земјата. „Не е доволно да се гледа на телевизија: мора да се види лично за да се разбере степенот на трагедијата“.

Мерц додаде: „Канцеларот (Шолц) е во право дека овде не се брани само Украина, туку демократијата и слободата – како што живееме во Германија“, рече Мерц.

Мерц стана сè погласен критичар на неактивноста на коалициската влада предводена од Социјалдемократската (СПД) наспроти украинските молби за тешко оружје, пред таа конечно да објави дека ќе испрати тенкови.

Но, Шолц сега се соочува со повици да го следи генералниот секретар на Обединетите нации, членовите на кабинетот на САД и британскиот премиер со сопствена посета на Киев, неколку недели откако руските сили не успеаја во обидите да го заземат, а потоа се повлекоа за да се фокусираат на офанзивата на стотици километри источно од градот.

Во понеделникот, Шолц рече дека нема да оди во Киев, бидејќи Зеленски претходно одби да го прими германскиот претседател Франк-Валтер Штајнмаер. Штајнмаер, сојузникот на Шолц од СПД, не е популарен во Киев бидејќи е поврзан со претходната германска политика за остварување блиски трговски и други врски со Русија.