НАТО во моментов разговара за можноста за соборување на руски ракети над Украина од страна на сојузничката противвоздушна одбрана.

Литванскиот претседател Гитанас Науседа и полскиот претседател Анджеј Дуда го изјавија ова за време на заедничката прес-конференција во средата во Варшава, пренесува новинската агенција Укринформ.

Неколку земји иницираат такви дискусии и сакаат оваа одлука да се донесе на ниво на НАТО.

„Земјите на НАТО започнаа дискусија на оваа тема. Денеска не можеме да кажеме дека дискусијата е завршена или дека имаме конкретни резултати“, рече Науседа.

Дуда истакна дека во февруари, за време на состанокот на шефовите на држави во Париз, дал предлог за соборување на руски ракети и беспилотни летала над територијата на Украина.

Тој истакна дека ваквата иницијатива била поздравена од украинските власти.

Сепак, како што истакна Дуда, лидерите на НАТО имаат различни ставови по однос на ова прашање.

„И за ова прашање постојано се разговара“, изјави Дуда.

Тој нагласи дека руските воздушни цели кои летаат над Украина треба да бидат соборени од територијата на земјите на НАТО и дека не се разговара за други опции за акција.

На 2 септември, НАТО го призна правото на своите земји-членки да го бранат својот воздушен простор од напади, но предупреди за потенцијалните последици за Алијансата како целина доколку земјите почнат да соборуваат руски ракети во близина на украинската граница.

Портпаролот на НАТО изјави дека Алијансата има одговорност да спречи понатамошна ескалација на руската војна. НАТО не е страна во конфликтот и нема да стане дел од конфликтот, додаде тој.

Тој предупреди дека ако сојузниците соборат руски ракети, тоа ќе има последици за целата Алијанса.

Претходно, полскиот министер за надворешни работи Радослав Сикорски изјави дека Полска треба да соборува руски ракети над територијата на Украина.