Либанскиот претседател Мишел Аун денеска му го додели на амбасадорот на таа земја во Германија, Мустафа Адиб, мандатот за состав на нова влада, откако ја обезбеди поддршката на мнозинството членови во Парламентот.

Претходната влада на Хасан Диаб поднесе оставка на 10 август, по катастрофалната експлозија во пристаништето во центарот на Бејрут, во која загинаа најмалку 200 луѓе.

Назначувањето на Адиб доаѓа пред втората посета на францускиот претседател Емануел Макрон за помалку од еден месец, чија цел е започнување на долго одложуваните реформи и надминување на кризата.

Адиб беше номиниран од група влијателни поранешни либански премиери, меѓу кои и Саад Харири, лидер на најголемата сунитска партија во земјата, Движење за иднината.

Неговото назначување мора да биде потврдено со мнозинство гласови во либанскиот Парламент, по што следи процес на формирање влада што може да трае неколку месеци, пренесува Би Би Си.