Леви џабе леташе за Мадрид, ништо од сензационалниот транфер на Бејл
Реал Мадрид одби да го пушти Герет Бејл во Тотенхем на позајмица.
Претседателот на Тотенхем, Даниел Леви, утрово одлета за Мадрид надевајќи се дека ќе успее да ја реализира трансфер-бомбата во последниот ден од зимскиот преоден рок. Леви и менаџерот на англискиот тим, Жозе Мурињо, сакаа во последниот ден од преодниот рок да го донесат Герет Бејл од Реал Мадрид, но беа одбиени од претседателот на „кралскиот“ клуб, Флорентино Перез.
Перез ја одби идејата на Леви за шестмесечна позајмица на Бејл со задолжителен откуп на крајот од сезоната, а медиумите шпекулираат дека и самиот фудбалер нема да прифател да се врати во Тотенхем.
– Бејл останува со нас и не размислувам околу шпекулациите за неговото заминување денеска – изјави тренерот на Реал Мадрид, Зинедин Зидан.
Неуспехот на ангажманот на Бејл, ги остави Мурињо и Леви само со една опција за замена на повредениот Хари Кејн. Тотенхем има 12 милиони евра за замена на Кејн и најверојатно ќе ги потроши за ангажирање на Оливие Жиру од Челси.
„Сините“ не се расположени да го продадат Жиру на екипа од Англија, но францускиот репрезентативец денеска побарал средба со челниците на Челси за да издејствува трансфер во Тотенхем.