Советот на Општина Центар на последната седница усвои значајни документи со кои треба да се воспостави ред во поставувањето урбана опрема на територијата на оваа општина.

Усвоена е Програмата за поставување урбана опрема за дел од подрачјето на Општина Центар за период од 2020 до 2025 година и Одлуката за утврдување потреба за поставување урбана опрема и условите, начинот и постапката за издавање одобрение за поставување урбана опрема на јавни површини. Со овие две одлуки се враќаат законските надлежности на општината да дава одобрение за поставување урбана опрема, но ѝ овозможуваат и да биде активен чинител за заштита на јавните простори на својата територија врз основа на закон.

Како што објаснуваат од локалната власт, задача и цел на донесените документи е да се унапреди јавниот простор, да се подобри неговото користење, да се овозможи насочување и заштита на сите учесници во сообраќајот и да се обезбеди заштита на јавниот интерес.

-Веќе подолг период Општина Центар е одлучна да воспостави ред со поставувањето времени објекти и урбана опрема на својата територија. Целта зад оваа тенденција е нерешеното прашање како се користат јавните површини, кој сѐ ги користи и под кои услови. Документацијата се донесува и со цел усогласување со Град Скопје за надлежностите за поставување урбана опрема на јавни површини – велат од Центар.

Со овие одлуки законска надлежност на Општината ќе биде издавање одобренија за поставување на сите видови урбана опрема на јавни површини на дел од територијата на Центар.

-Со програмата за поставување урбана опрема се уредува видот и големината на урбаната опрема која се поставува на јавни површини, како и можните локации и зони каде да се поставува. Програмата опфаќа дел од територијата на Општина Центар, опфатите дефинирани со деталните урбанистички планови Дебар Маало 1, Дебар Маало 2, Централно зеленило покрај реката Вардар и Мал ринг – рече Саша Богдановиќ.

Предмет на обработка е само дел од територијата на општината, како што информираат од Центар, за да се посвети поголемо внимание и подетално да се обработи материјата. Во изработката на програма се користи детална инвентаризација на состојбата на терен (зеленило, постојна комунална урбана опрема и инфраструктура), планираните решенија од актуелните детални планови и важечкиот Правилник за нормативите и стандардите при поставување урбана опрема донесен од Град Скопје.

-Сликата на терен покажува дека досегашните решенија биле избрзани, паушални и несоодветни. При поставување урбана опрема, досега се окупираше јавен простор. И покрај тоа што постојат широки тротоари и дрвореди, неконтролираното и несоодветно поставување урбана опрема од секаков вид го наруши изгледот на просторот и ја уназади употребата на јавниот простор од граѓаните. Јавните површини наместо да бидат шеталиште за граѓаните, се непроодни зони за пешаците и велосипедистите. Затоа, ја носиме оваа одлука со која ќе се унапреди јавниот простор и ќе се подобри неговото користење – стои во образложението на Богдановиќ доставено до Советот на Општина Центар.