Екипата на Лестер дојде до осмата победа по ред во Премиер лигата откако на гостувањето кај Астон Вила славеше со 1:4. Според прикажаните игри во досегашниот дел од сезоната но и според состојбата на табелата, токму Лестер е единствен конкурент на Ливерпул во трката за титулата.

„Лисиците“ со новиот триумф дојдоа до 38 бодови за второ место на табелата, осум помалку од лидерот Ливерпул, но и шест повеќе од шампионот Манчестер сити.

Повторно фантастичен натпревар одигра Џејми Варди постигнувајќи гол на и на осмиот натпревар по ред, и остана во потера по сопствениот рекорд кој изнесува 11 натпревари во низа на кои постигнува гол. Интересно е што рекордот Варди го постави во сезоната 2015-16 кога Лестер ја освои титулата.

Токму Варди со голот во 20. минута го отвори резултатот, а Ихеначо на четири минути до крајот на полувремето зголеми на 0:2. Тронка надеж за Астон Вила даде Џек Грилиш кој во судиското продолжение намали на 1:2.

Сепак, во второто полувреме, прво Еванс зголеми на 1:3 во 49. минута за во финишот Варди да го постави конечниот резултат.

Во останатите два натпревари, Норвич е поразен со 1:2 од Шефилд јунајтед, додека Њукасл пред своите гледачи со 2:1 го совлада Саутемптон.