Пејачката Лејди Гага со организацијата „Глобал ситизен“ досега собра 35 милиони долари за борба против коронавирусот, а ќе организира и специјално ТВ-шоу, во кое, меѓу другите, ќе учествуваат и Пол Макартни, Стиви Вондер и Били Ајлиш.

Лејди Гага потенцираше дека парите се собрани за седум дена и дека ќе бидат испратени до Светската здравствена организација (СЗО), пренесува АП.

За да се соберат дополнителни средства што ќе бидат наменети за фондациите и здравствените работници што се борат со коронавирусот, ќе биде организиран концертот насловен „Еден свет: Заедно дома“, кој всушност ќе биде виртуелна телевизиска манифестација, со која ќе им се оддаде признание на здравствените работници.

Емисијата ќе се емитува истовремено на Еј-би-си, Ен-би-си, Си-би-ес и Хартмедија и Белмедија на 18 април, во 20 часот. Повеќечасовната програма исто така ќе ја пренесуваат и стриминг-платформите Јутјуб, Епл, Фејсбук, Инстаграм, Твитер.

Домаќини на ТВ-специјалот ќе бидат американските ТВ-презентери Стивен Колбер, Џими Фалон и Џими Кимел.