Пејачката Лејди Гага е дел од организацијата на проектот „Еден свет: Заедно дома“, кој ќе се одржи вечерва и ќе биде виртуелна телевизиска манифестација, со која ќе им се оддаде признание на здравствените работници.

На шестчасовниот концерт присуството го најавија повеќе од 100 изведувачи од целиот свет, меѓу кои и Пол Макартни, Стиви Вондер, Били Ајлиш, Алиша Кис, Селин Дион, Камила Кабељо…

Целта на концертот е да се даде поддршка на здравствените работници што се борат со коронавирусот.

Шоуто ќе се емитува истовремено на Еј-би-си, Ен-би-си, Си-би-ес и Хартмедија и Белмедија вечерва, во 20 часот по македонско време. Повеќечасовната програма ќе оди во живо и на Фејсбук, Инстаграм, Амазон прајм, Твитер и Јутјуб.

Водители на ТВ-специјалот ќе бидат Стивен Колбер, Џими Фалон и Џими Кимел.

Лејди Гага го организира „виртуелниот концерт“ заедно со движењето „Глобал ситизен“ и со Светската здравствена организација и нагласи дека вечерва нема да се собираат пари, туку целта е забава и испраќање порака на солидарност.

„Оставете ги вашите паричници, седнете и уживајте во шоуто“, рече Лејди Гага.