ВИДЕО | Легендардната „Ако умрам, ил загинам“ на Јонче Христовски дел од новиот албум на „Црвена Јабука“
Песните на Јонче Христовски изобилуваат со изворен македонски народен звук и ритмика и силен македонски патриотски дух на љубов кон Македонија, но и кон животот, песната, љубовта. Создаде сопствен интерпретативен стил, препознатлив и комуникативен со публиката. Најзапаметени меѓу народот ќе останат неговите сценски настапи со фрлање на палтото на земја, бакнување на земјата и боемскиот мераклиски начин на живот отсликан во неговите изведби на песните.
Петнаесет нови песни со ретро звук потсетуваат на „Црвена Јабука“ во нејзините најдобри денови. Како и секогаш, темата на песните е љубовта, а на многу од нив се провлекуваат контурите на Сараево. Новиот студиски албум „Нека нова јутра“ на Црвена јабука конечно е пред фановите. Најавен со насловната песна и спот, овој албум го разбуди медиумскиот интерес на целиот регион.
Албумот содржи и преработка на големиот хит на Нови фосили – „Тонка“, која Жера ја отпеа во спомен на големиот композитор и пријател Рајко Дујмиќ и Марио Пејиќ, а она што особено ќе им се допадне на фановите во Македонија е песната „Ако умрам, ил загинам“, напишана од Јонче Христовски, која во оваа прилика Жера маестрално ја отпеа.
И овој албум, како и дузина претходни на „Црвена Јабука“, е во издание на најголемата дискографска куќа во регионот – Croatia Records. Автор на повеќето песни е Мирко Шенковски Џеронимо кој заедно со Дражен Жериќ Жера и Ларис Пашалиќ ги потпишува и сите аранжмани на песните.
Покрај Џеронимо, авторскиот тим го сочинуваат: Дино Мухаремовиќ, Фадил Бутуровиќ, Драгана Кајтазовиќ-Шенковски, Мирза Хамзакдиќ Харо, Амир Мисирлиќ и Златан Фазлиќ.