Леброн е број еден, Дончиќ четврти најдобар играч во НБА
Американската телевизија ЕСПН направи листа на кошаркари од кои очекува да бидат најдобри во претстојната сезона која започнува на 22. декември.
Очекувано на првото место, односно најдобар играч во НБА е Леброн Џејмс кој минатата сезона му ја донесе 17. шампионска титула на ЛА Лејкерс.
„Кралот останува крал“, објаснува ЕСПН и очекува Џејмс да го предводи тимот во новата сезона во која се главни фаворити за титулата, а најдобрите игри од него ќе бидат во плејофот.
Веднаш зад Леброн Џејмс на второто место на најдобри играчи е неговиот клупски колега Ентони Дејвис. На третото место е МВП на лигата во последните две години Јанис Адетокумпо од кого ЕСПН очекува да го подобри шутот за три поени.
На четврото место е Лука Дончиќ кој е најмладиот кошаркар на ова листа на најдобри играчи.
„Следниот голем НБА суперстар во својата втора сезона во НБА успеа да стане најмладиот играч избран во најдобрата петорка. Дончиќ беше импресивен во својот дебитантски плеј-оф настап против ЛА Клиперс постигнувајќи просечно по 31 поени, 9.8 скокови и 8.7 асистенции. Наредната сезона Дончиќ ќе го предводи Далас во победа во плеј-офот“, пишува ЕСПН за Дончиќ.
На листата на десетте најдобри кошаркари во НБА се наоѓаат уште и Каваи Ленард (ЛА Клиперс), Кевин Дурент (Бруклин), Демиен Лилард (Портланд), Стеф Кари (Голден Стејт), Џејмс Харден (Хјустон) и Никола Јокиќ (Денвер).
