Лазарова Трајковска: Ветингот не е решение за македонските судови

Судиите се замолчани, вели Трајковска, не се активни и не учествуваат во реформите. Со месеци се зборуваше за ветинг, а ние не слушнавме мислење од судството.

Ова е Закон каде што се утврдуваат надлежностите, составот, начинот на избирање на Јавното обвинителство (ЈО), закон кој што треба да даде одговор на прашањата во однос на организациската поставеност на Јавното обвинителство, вели во „Утрински брифинг“ на „Слободна ТВ“, поранешната судијка во Европскиот суд за човекови права, Мирјана Лазарова – Трајковска.

-Според мене Законот можеше да понуди и многу повеќе. Ако го анализирате и законот од 2007 ќе видите дека е работен по европски стандарди и решенијата кои што ги нуди не се лоши. Венецијанска комисија даде мислење за законот од 2007 година и таму идејата јавниот обвинител да се именува преку постапка која ќе помине преку Советот на обвинители на предлог на Владата ги обединуваше сегментот на стручната јавност, Владата и Собранието. Но, во пракса се покажа дека овој начин на избирање на првиот човек на обвинителството партиите си го зедоа под свое, па секогаш кога ќе излезеа со некој обвинител кој што ги поминал партиските филтри, во јавноста перцепцијата беше веќе изградена- вели Мирјана Лазарова – Трајковска.

Концептот, вели Трајковска, треба да води кон тоа да се сочува самостојноста на ЈО, да му се даде простор на најстручниот меѓу најстручните да ја води таа организација.

-Јас не знам дали ова што се зборуваше на јавната расправа ќе биде отсликано во предлогот. Многу е важно да се види која ќе биде финалната верзија на она што ќе излезе пред Собрание. Добро ќе беше да се прати овој Закон повторно пред Венецијанска комисија, затоа што експертите кои што работеа на Законот за ЈО, беа и составен дел од групата на Прибе. Но ние секогаш во некаков теснец ги работиме законите и после повторно одиме со измени и дополнувања. Важно е на ЈО да му се даде позиција во правосудниот систем како што заслужува, за да може да ги врши надлежностите утврдени со Законот за кривична постапка- вели поранешната судијка на Европскиот суд за човекови права, Мирјана Лазарова – Трајковска околу правосудниот систем, состојбите со правото и правдата во Македонија, и новиот предлог Закон за ЈО.

Околу случаите што ги водеше СЈО и правењето напори да се стопираат одложат, Трајковска вели:

-Се почна од СЈО и обидот тие предмети да се насочат кон некаква друга завршница. Ние со години наназад гледаме дека неказнивоста е главната филозофија кога станува збор форми на криминал поврзани со политиката. Тие предмети треба да си се завршат според процесниот закон за кривична постапка. Но на добар дел од прашањата одговор треба да даде судот во своите пресуди и одлуки. Не смеат да останат овие прашања неодговорени- вели Трајковска.

Судиите се замолчани, вели Трајковска, не се активни и не учествуваат во реформите. Со месеци се зборуваше за ветинг, а ние не слушнавме мислење од судството. Реформи се прават од 1991 година па наваму. Тоа е голем проблем. Говори за немање доволно независност и самостојност.

-И во пресуди на Европски суд за човекови права ние посочуваме дека во македонското судство главниот проблем е недостатокот на независност. Ние можевме да видиме дека некои од судиите се јавуваат и како функционери на политичките партии. Се работи за клиентелизам, непотизам, поврзаност со адвокати, обвинители. Сè тоа влијае на перцепцијата на судството. Но генерално Судството во Македониа и не е така лошо. Тоа го кажува и Прибе во своите два извештаи. Но недостасува ликот на судството. Ние имаме Врховен суд без претседател, со в.д. Но погледнете ги судовите во Полска, во Унгарија. Претседателот на Врховниот суд на Унгарија излезе и учествуваше во реформите. Ги критикуваше истите. На крајот беше жртва на неговиот јавен настап во делот на реформите- вели Трајковска.

Погледнете ја претседателката на Врховниот суд во Обединетото Кралство, вели Трајковска, во декември во Британија излегоа со концепт дека судиите треба да се бираат како оние во САД. Но таму првиот човек на Врховниот суд излезе и учествуваше во дебатите.

-Ние немаме учество на судии кои од нивна перцепција би кажале дали нашето судство е корумпирано, дезорганизирано. Кај нас се очекува дека првите луѓе на судството ќе го претставуваат судството. Не можат сите судии да излегуваат на телевизија. Но судиите од високите судови, претседател на Уставен, претседател на Врховен, претседателите на Апелација итн.. треба да бидат линкот со јавноста. Во изминатите многу години, од 1991 година наваму ние правиме реформа на судството. И судиите ’95 поминаа низ еден циклус на реизбор. Лустрацијата ја поминаа и сега слушаме за ветинг- вели Трајковска.

Во принцип судиите мора да бидат предмет на постојана обсервација на стабилни институции кои што ќе си ја вршат работата. И ветингот ја има таа цел. Ветингот има смисла само на почетокот на избор на судијата. Ние го имавме тој систем во едно друго време.

-Пред да биде избран, треба да го помине системот на проверки. Сега таа улога треба да ја има Судскиот совет и со измените на Законот за судови, Судскиот совет сега има поголема надлежност во однос на утврдувањето на квалитетот и нтегритетот на работата. Тие исто така можат и да го проверат истото понатака. Не е нормално Судскиот совет или ДКСК да ја проверува корупцијата. Ние имаме ЈО, Финансиска полиција, УЈП. Каков систем ќе одбере земјата зависи од многу аспекти. Историско – правните поставености на правосуниот систем, формите на криминал кои што се јавуваат. Но моето укажување дека ветинг или форми на краткорочно прочистување на судството немаат ефект во праксата. во пракса ефект имаат институции кои трајно и темелно работат- вели Трајковска во „Утрински брифинг“ на „Слободна ТВ“.

Почитуван читателу,

Нашиот пристап до веб содржините е бесплатен, затоа што веруваме во еднаквост при информирањето, без оглед дали некој може да плати или не. Затоа, за да продолжиме со нашата работа, бараме поддршка од нашата заедница на читатели со финансиско поддржување на Слободен печат. Станете член на Слободен печат за да ги помогнете капацитетите кои ќе ни овозможат долгорочна и квалитетна испорака на информации и ЗАЕДНО да обезбедиме слободен и независен глас кој ќе биде СЕКОГАШ НА СТРАНАТА НА НАРОДОТ.

ПОДДРЖЕТЕ ГО СЛОБОДЕН ПЕЧАТ.
СО ПОЧЕТНА СУМА ОД 60 ДЕНАРИ

Видео на денот