Данило Брестовац имаше победничко деби на селекторската функција но капитенот на македонската ракометна репрезентација, Кире Лазаров не го заборава ниту неговиот претходник. Во историската победа над Исланд свој печат има ставено и екс селекторот Раул Гонзалез.

– Секогаш велам, Македонија е „инфицирана“ со ракомет. Треба да гледаме напред, имаме иднина, се прават одлични работи и во младинскиот ракомет. Ова е голем триумф за нас. Морам да кажам дека користевме и од „работите“ на Раул Гонзалес, иако не сакам да ја омаловажам дебитанската победа на новиот селектор Данило Брестовац кој не остави да играме. Одигравме мудро, како што се договоривме, а сега треба да бидеме уште подобро подготвени за реваншот в недела во Скопје, затоа што Исланд можеби сега и не потцени. Сигурен сум дека во Скопје ќе видиме уште посилен Исланд – рече капитенот Кире Лазаров.