Ракометната репрезентација на Македонија со пораз ги започна настапите на ЕП 2022, „црвено-жолтите“ се поразени од Словенија со 25:27.
Селекторот Кирил Лазаров, кој поради повреда на потколеницата нема да може да ја има улогата на капитен на паркетот, е задоволен од прикажаната игра на неговите избраници.

– Горд сум на тоа што го одиграа момците. Словенија има играчи кои играат во најдобрите европски екипи. Покрај тоа сум и разочаран бидејќи мислам дека заслуживме најмалку бод или два. Спроведовме доста работи. Физички ги уморивме и ги надигравме, едноставно не верувавме до крај дека можеме да ги добиеме. Пробав да ги убедам, но на крај не успеав во тоа и тоа сум единствено разочаран. На прав пат сме и треба да продолжиме така. Треба да го заборавиме поразот и да одиграме два добри натпревари. Прво треба да ја добиеме Црна Гора па потоа да мислиме и на Данска. Секој меч е тежок на големо натпреварување, но мислам дека ќе бидеме сè подобри и подобри. На вистинскиот пат сме со овие млади момци. Во моментов чувството е добро, но мислам дека утре кога ќе се разбудиме ќе се чувствуваме лошо – вели Лазаров.