Лазаров: Данска е машинерија која гази, доколку сум здрав ќе играм во баражот

Кирил Лазаров дебитираше на Европско првенство како селектор/ фото: EPA-EFE/Zsolt Czegledi

Селекторот Кирил Лазаров вели дека Данска заслужено дојде до убедлив триумф и покрај добриот старт на неговите ракометари.

– Едноставно сакам да се подготвувам за натпревар со големи противници. Но, колку и да се трудев ова беше невозможна мисија да дадеме поголем отпор, и покрај тоа што во големиот дел од мечот дадовме отпор и тоа со неафирмирани играчи. Овие минути што им ги дадовме на овие играчи, можеби многу ќе им значат. Треба во иднина да ги пронајдеме 16 до 20 играчи кои би служеле за Македонија. Друго е кога ќе видите некој играч во македонско првенство, а друго е истиот играч тука на ЕП против Данска. Тука треба да ни биде јасна сликата на кого да сметаме, за да дојдеме до тие 20 играчи. Покажавме дека можеме да бидеме конкуренти против Данска која е една машинерија која гази. Имавме нов пех, рано се повреди и Кузмановски. И некои нивни резерви беа најдобри играчи и тоа кажува за каква селекција станува збор – вели Лазаров кој не вели дека нема замерки за ракометарите.

– Делумно сум задоволен, важно е да оформиме чиста слика. Многу ни значи ова ЕП, видовте дека Црна Гора ја изненади Словенија, сепак, сме имале два силни противници, мислевме дека со Црна Гора ќе победиме. Ќе го сфатиме ова како позитивно искуство. Не им замерувам играчите, одработивме екстра подготовки. Во тие 24 дена трениравме напорно. Но, некогаш не може да одите против проблемите. Најверојатно требало ова да се случи, со насмевка го прифаќаме, со кисела насмевка.

Иако во Дебрецин не можеше да настапи поради повредата на потколеницата на еден од последните тренинзи пред првиот натпревар на ЕП со Словенија, Лазаров најави дека ќе игра во бараж натпреварите.

– Доколку сум здрав во баражот, ќе играм. Моето присуство значи. Јас се подготвував за ова ЕП, но мене ми е жал што не настапив. Се распаднавме како кула од карти ден по ден. Одеднаш почна да се руши се, и некои добија шанса да играат на големо натпреварување. Треба да анализирам и да одберам 20 играчи на кои ќе сметам во баражот – додава Лазаров.

Видео на денот