Министерот за надворешни работи на Русија, Сергеј Лавров, изјави дека критиките на сметка на Светската здравствена организација за наводно криење на информацииза ширењето на корона вирусот се неправедни.

– Специјалните агенции на ОН остануваат механизам за мултилатерална соработка во релевантни области, и не постои алтернатива за нив, истакнува Лавров за време на видеоконференција која претставуваше предавање за студенти на рускиот универзитет „MGIMO“.

– Тоа во потполност се однесува на активностите на СЗО. Веруваме дека критиките на сметка на оваа организација и обидот да и се припише одговорност за она што се случува се апсолутно контрапродуктивни и неправедни. Во сите фази од кризата, според нашето мислење и според оценките на поголем број држави, организацијата делуваше професионално, преземајќи навремени проактивни чекори и притоа споделувајќи информации и препораки за сите држави, истакнал Лавров.

На 14. април американскиот претседател Доналд Трамп, изјави дека Вашингтон ќе го запре финансирањето на СЗО и ја обвини агенцијата за исклучително погрешно управување  со пандемијата од корона вирусот.