Лапорта: Најдобриот фудбалер на светот ја сака Барселона
Новиот претседател на Барселона, Жоан Лапорта верува дека ќе успее да го задржи Лионел Меси на „Камп Ноу“.
Лапорта вчера беше избран за претседател на Барселона и очекувано едно од првите прашања беше поврзано со иднината на Лионел Меси.
– Поминаа точно 20 години откако момчето по име Лео Меси дебитираше за тимот на Барселона до 13 години. Тоа што најдобриот фудбалер на светот на гласање пристигна со својот син, потврдува дека Лео ја сака Барселона. Најдобриот фудбалер на светот го сака овој клуб и се надевам дека поради тоа ќе остане – изјави Лапорта.
Договорот на Лионел Меси истекува на крајот од сезоната. Минатото лето Меси сакаше да си замине од Барселона, но тогашниот претседател Хосеп Марија Бартомеу не му дозволи да си оди без обесштетување и поради тоа Аргентинецот одлучи и оваа сезона да остане на „Камп Ноу“.
Жоан Лапорта се врати на чело на Барселона по 11 години, во првиот мандат (2003-2010) каталонскиот клуб освои четири титучи во Ла Лига, две во Лигата на шампионите, три Суперкупа на Шпанија и по еден Кралски куп, европски Суперкуп и ФИФА светски клупски куп.
