Лампард објасни зашто го пријави пензионерот Чех за Премиер лигата
Вчера Челси ја шокира фудбалската јавност со објавата дека во продолжението од Премиер лигата го пријави актуелниот клупски функционер Петр Чех, кој кариерата ја заврши пред две години.
Покрај тројцата голмани, Менди, Кепа и Кабаљеро, менаџерот Френк Лампард одлучи да регистрира и четврти голман и тоа клупската легенда Петр Чех, кој сега е советник за спортски и технички прашања во Челси.
Денеска Лампард објасни зашто го стори тоа.
– Дефинитивно тоа не го направивме бидејќи е романтично. Имавме едно место слободно на списокот за лиценцирање на играчи, а гледаме дека сезонава е поинаква од сите други поради состојбата со коронавирусот и со изолациите. Доколку западнеме во криза, тешко дека ќе може да најдеме подобро решение од ова. Петр е релативно млад и можеше да брани уште неколку години но тој одлучи да ја заврши кариерата. Тренира редовно и се наоѓа во добра форма. Не знам дали ќе го видиме на терените, но Петр тренира секој ден и може да им биде од голема помош на нашите голмани бидејќи тренираат со еден од најдобрите во историјата – изјави Лампард кој донесе и конечна одлука кој голман ќе биде прв избор во продолжението од сезоната.
– Менди е прв голман. Начинот на кој брани е многу добар и задоволен сум од него. Зад себе има два натпревари без примен гол и како што стојат работите, тој ќе биде прв голман. Бевме свесни дека имаме проблем на голманската позиција уште од минатата сезона и мора да бидеме искрени и отворени по ова прашање. Менди дојде за да бидеме уште подобри.