„Ла Лига“: Барди запиша седум голови, загрижува учинокот на Трајковски!
Официјално заврши натпреварувачката сезона 2019/2020 во најсилното шпанско првенство, Реал Мадрид е новиот шампион пред најголемиот ривал Барселона.
Најдобар стрелец сезонава во „Ла Лига“ е аргентинската ѕвезда на Барса, Лионел Меси со 25 голови
Секако ги следевме и настапите на Леванте и Мајорка во чии редови настапуваат двајцата македонски репрезентативци Енис Барди (25) и Александар Трајковски (27).
Барди имаше одлична сезона во дресот на Леванте кој обезбеди опстанок со освојување на 12 место. Нашиот играч имаше 30 натпревари (на 23 од нив беше стартер), забележа и седум погодоци, два против Селта Виго, а по еден против Атлетик Билбао, Бетис, Еспањол, Гранада и Реал Сосиедад. Со своите игри успеа и да го привлече вниманието на премиерлигашкиот гигант Арсенал.
Од друга страна загрижува учинокот на Трајковски кој во првата сезона во дресот на Мајорка не успеа ниту еднаш да се запише во листата на стрелците. А воедно лоша вест е и што неговиот клуб не успеа да остане во елитата, па следната сезона ќе игра во Сегунда.
Трајковски (кој има договор со Мајорка до 30 јуни 2023 година) претходно во едно интервју за клупскиот сајт рече дека навивачите нешто очекуваат од него, и дека не ја добива често шансата да започне од првата минута.
Имаше 14 настапи, само еднаш беше стартер во составот на Висенте Морено на 3 јули во гостинскиот пораз кај Атлетико Мадрид (3:0).