Во женска конкуренција чешката тенисерка Петра Квитова успеа да ја елиминира Жанг Шуаи од Кина во осминафиналето на грен слем турнирот „Ролан Гарос“.

На мечот во Париз (Франција) кој траеше еден час и 19 минути, Квитова го доби првиот сет со 6:2, а вториот со 6:4.

Од почетокот на турнирот, Чехинката не загуби ниту еден сет. Според остварените резултати во францускиот главен град, Квитова ќе се врати во Топ 10 на ВТА ранг листата.

Ова е нејзин втор пласман во четвртфиналето на парискиот Грен слем. Таа стигна до оваа фаза во 2012 година. За пласман во полуфиналето, Квитова ќе ги одмери силите со Лора Зигемунд од Германија која беше подобра од Паула Бадоса Гиберт од Шпанија.

Кај мажите рускиот натпреварувач Андреј Рублев со 3:1 во сетови 6:7 (4), 7:5, 6:4 и 7:6 (3) го совлада Унгарецот Мартон Фучович.

Рублев за пласман во полуфиналето ќе игра против Гркот Стефанос Циципас кој триумфираше над Григор Димитров од Бугарија со 6:3, 7:6 (9) и 6:2.