Квалификации за ЕП: Натпревар на одлука за кошаркарите
Селекторот Александар Тодоров за одлучувачкиот натпревар против Естонија ќе смета и на повредениот Ненад Димитријевиќ.
Кошаркарската репрезентација на Македонија денеска (15 ч.) против Естонија го игра најважниот натпревар во последните неколку години. Влогот од денешната средба на квалификацискиот турнир во Перм, Русија, е пласман на Европското првенство кое ќе се игра идната година.
По вчерашната победа над Италија и поразот на Естонија од Русија, избраниците на селекторот Александар Тодоров добија можност денеска сами да одлучуваат за својата судбина.
За пласман на Евробаскетот потребна е победа од девет или повеќе поени и тоа поради поразот од 72:81 на стартот од квалификациите. Поради тоа, селекторот Тодоров одлучи да не го менува тимот кој ја совлада Италија иако на тој дуел се повреди Ненад Димитријевиќ. Одличниот кошаркар во финишот од натпреварот заработи повреда на коленото, но во нашата репрезентација се надеваат дека Димитријевиќ ќе може да им помогне на соиграчите и да се победи Естонија.