Кузмановски: Ќе бидеме подготвени за првиот меч на ЕП против Словенија
Македонската ракометна сениорска репрезентација го започна вториот дел од подготовките пред настапот на Европското првенство во Унгарија и Словачка (13-30 јануари 2022 година).
Предводени од селекторот Кирил Лазаров уште на првиот ден од новата година продолжија со тренинзите, а во понеделник (3 јануари) и вторник (4 јануари) се закажани нови контролни мечеви, ривал ќе биде селекцијата на Израел.
Потсетување дека првиот дел од подготовките се реализираше во Маврово каде што нашите ракометари тестираа против Кувајт и двапати победија.
Денеска Ракометната федерација на Македонија (РФМ) ја информираше јавноста дека играчите направија ковид тестирања и сите беа негативни.
Филип Кузмановски, кој треба да биде еден од носителите на играта на ЕП, играчот на Хановер-Бургдорф подоцна се приклучи, но со настапите во Бундеслигата докажа дека е во добра форма.
– Јас подоцна ѝ се приклучив на репрезентацијата, затоа што германското првенство (полусезона) заврши на 28 декември. Гледав максимално да ги искористам тие денови да бидам со репрезентацијата, знам дека се подготвуваме и тактички и со видеа, сакав да бидам присутен. Среќен сум од тоа што сите сме комплетни, можеме заедно сите да тренираме, да бидеме подготвени, ќе играме и два натпревари против Израел. Тренираме и мислам дека ќе бидеме спремни за првиот натпревар на ЕП против Словенија, тој ни е во мислите – вели Кузмановски.
Првиот натпревар на Македонија на Европското првенство ќе биде на 13 јануари во унгарскиот град Дебрецин со почеток од 18.00 часот.