Кузмановски: Едно се договараме, друго играме…
Maкедонската репрезентација вечерва забележа нов убедлив пораз откако Холандија беше подобра со 24:34.
Секако дека овој пораз донесе големо разочарување кај нашите ракометари, а тоа не го криеше и Филип Кузмановски.
„Спремни пристигнавме на овој шампионат. Трениравме напроно и посветено на подготовките. Навистина не знам што се случи вечерва, исто како и против Норвешка игравме само 20-тина минути и потоа ништо не покажавме. Под емоции сум, не знам што да кажам. Едно се договораме, друго играме…
Во селекцијата нема стари и млади, туку само добри и лоши. Момците што ќе влезат од клупата мора да ни помогнат, не може товарот да биде врз одредени ракометари. Сакам да им се заблагодарам на навивачите што дојдоа да не бодрат и тука“, изјави Кузмановски.
Македонија и покрај двата порази има шанси за пласман во следната фаза, но за такво нешто мораме да славиме против Аргентина во вторник (18:00 часот).