Курц оптимист: Со милион дози на „Спутник V“, можеме побрзо да се вратиме во нормала
Австрија во борбата против коронавирусот е се поблиску до склучување договор за набавка на руската вакцина „Спутник V“. На тоа укажува и денешната објава на австрискиот канцелар Себастијан Курц на социјалните мрежи.
– Со милион дози на „Спутник V“ би можеле побрзо да се вратиме во нормала, напиша Курц на својот фејсбук-профил.
Иако Европската агенција за лекови (ЕМА) сè уште нема дадено одобрување за руската вакцина, Австрија очевидно одлучила да започне билатерална набавка. Во Виена вчера е потврдено дека се размислува за набавка на еден милион вакцини „Спутник V“, а првите пратки би можеле да пристигнат следниот месец.
Курц претходно порача дека е единствено важно во оваа борба вакцината да биде ефикасна и безбедна, а не каде е произведена.
Тој за денеска најави средба со рускиот амбасадор во Австрија, Дмитриј Љубински.