Веб-продавниците бележат огромно зголемување на побарувачката за модни додатоци и облека во изминатата година. Иако поголемиот дел од времето го поминуваме дома, сепак, фактот стои дека луѓето сè уште масовно купуваат, само што сега тоа го прават од удобноста на своите домови.

„Велика Британија бележи силен раст во делот на продажбата преку Интернет, дури 61,4% само во декември минатата година, во споредба со истиот период од претходната година“, објави Заводот за национална статистика, пишува „Гардијан“.

Минатиот месец, онлајн продавниците „Асос“ и „Бохо“ ги купија компаниите „Дeбeнхамс“ и „Топшоп“, зајакнувајќи го нивното лидерство на пазарот.

Овој тренд може да стане постојан и да го промени начинот на купување, односно да влијае на затворање на уште повеќе „физички продавници“..

Покрај фактот што огромен број луѓе посегнаа по купување на Интернет, дизајнерите сега прават поразлични дизајни и повеќе ги земаат предвид различните силуети и облици на тело. Модните трендови почнаа да носат волумен и акцент на широки кроеви кои гарантираат поголема удобност, без разлика дали работите од дома или во канцеларија.

Од друга страна, проблемот кој се однесува на екологијата повторно е во пораст, односно прекумерното купување и низата можности што ни ги даваат онлајн продавниците, ја потенцираат темната страна на конзумеризмот.

Премногу облека и прекумерното купување и производство на истата влијаат на околината, и токму тоа е проблемот што неодамна станува сè поактуелен во светот.