Навивачите на Ајнтрахт Франкфурт се вистински хит оваа сезона, кога е во прашање поддршката која им ја даваат на играчите на овој германски клуб.

Сè уште се зборува за импресивните сцени од стадионот „Камп Ноу“ каде што го окупираа каталонскиот град и ги шокираа дури и тренерот и играчите на Барселона со појавата на дури 30.000 симпатизери на трибините.

Пред финалето на Лигата на Европа, кое ќе се одигра во среда, на 18 мај, во Севиља на стадионот „Рамон Санчез Пишуан“, тие се организираа на малку поинаков начин.

Со оглед на тоа што и Ајнтрахт и Ренџерс добија „само“ по 10.000 влезници, навивачите на германскиот тим кои не се меѓу тие среќници, ќе можат да го следат натпреварот на својот стадион во Франкфурт. Сите 50.000 билети беа распродадени, а цената беше само 10 евра.

Ќе биде организирана и придружна програма, ќе присуствуваат познати гости, со цел да се следи финалето на ЛЕ, а победникот од тој меч следната сезона ќе игра во групите на Лигата на шампионите.

Исто така намерата на овој бундеслигашот е да ја добие организацијата на финалето на Лига Европа во 2026 година.

– Нашите навивачи заслужуваат да го гледаат финалето на својот стадион. Актуелните настани поврзани со клубот се одлична реклама за да ја добиеме организацијата на финалето – соопштија од германскиот клуб.