Куманово опколено со 60 диви депонии
И годинава ќе се чистат депониите во Куманово, за што се предвидени средства во буџетот за хигиена и зазеленување на општината, информираше градоначалникот Максим Димитриевски. На подрачјето на општината се евидентирани 60-тина „диви” депонии. И покрај редовните и вонредните акции за чистење на депониите често се случува еднаш исчистена локација за кусо време да се претвори во депонија, како што е пред населбата Перо Чичо.
– Општината секоја година спроведува акција на некои локации по повеќе пати во текот на годината, а воедно и во речните корита и повторно ја имаме истата состојба, затоа што се исфрла комунален отпад, но и друг тип на градежен отпад на различни локации. Минатата година имаме издадено околу 15 прекршочни казни на такви сторители. Оваа година од тие 27 милиони денари е предвидено и чистење на дивите депонии, но дополнително општината доби средства од Светска банка односно долгорочен кредит со еден процент камата, каде што ќе обезбеди и техничка опрема три возила комбинирани багери и дополнителни три камиони што ќе се користат за оваа намена. Нашата цел е да живееме во чист и уреден град и се надевам дека доколку се подигне самата свест кај граѓаните ќе успееме заедно во тоa – изјави Димитриевски.