Куман: Барса не може да биде фаворит во Лигата на шампионите!
Утре (20. октомври) официјално започнува новата сезона во фудбалската Лига на шампионите, а Барселона во својот прв натпревар на домашен терен ќе ги одмери силите против Ференцварош (21.00 часот).
Во групата „Г“ со Унгарците и каталонскиот гигант се наоѓаат уште екипите на Динамо Киев и Јувентус кои на стартот ќе играат во Украина од 18.55 часот.
И натаму се зборува за срамниот пораз на Барса во минатата сезона и елиминацијата од Баерн Минхен (подоцна европски шампион) со резултат 8:2, а изминатиот викенд играчите на тренерот Роналд Куман во шпанската „Ла Лига“ изненадувачки загубија од Хетафе (1:0) за моментно дури деветто место во генералниот пласман со седум бода од четири натпревари.
The @ChampionsLeague. Is. Back. pic.twitter.com/qObhiMK4lE
— FC Barcelona (@FCBarcelona) October 19, 2020
– Во Барселона мора да играте за да освоите титули, на домашната и меѓународната сцена. Но, има силни клубови и морате да ги докажете вашите квалитети. После сето тоа што се случуваше во клубот, ние не сме фаворити, но можеме да стигнеме далеку. Ференцварош е еден незгоден тим и го почитуваме. Мораме да го запреме нивниот квалитет. Имаат добри играчи во одбраната и важни фудбалери во нападот. За нас најважно е да стартуваме со триумф во ЛШ – рече Куман на денешната прес-конференција.
Исто така, холандскиот стратег зборуваше и за слабиот старт на Лионел Меси оваа сезона.
– Мислам дека неговите перформанси можат да бидат подобри. Но, го гледам како секојдневно е среќен и тренира добро. Тој е фокусиран, сака да биде капитетнот и секако со голема желба да игра. Немам никакви забелешки и сомневања околу него – додаде Куман.