Тренерот на Барселона, Роналд Куман нема намера да си замине по крајот на сезоната, иако некои од претседателските кандидати веќе назначија свои кандидати за нов стратег на екипата.

В недела Жоан Лапорта, Виктор Фонт или Тони Фреиша ќе биде избран за шеф на Каталонците и можно е од наредното лето еден од нив да изрази желба да ангажира нов кормилар на клубот.

– Досега не разговарав со никого за мојата иднина, затоа што треба да почекаме да видиме кој ќе биде претседател. Тогаш ќе треба да се сретнеме со неговиот тим и да разговараме. Како и да е, доколку мислат дека нема да бидам важен за во иднина, ќе имаме проблем, бидејќи имам договор за уште една сезона – рече Куман.

Кога дојде пред почетокот на сезоната, Холанѓанецот потпиша договор на две години, но според некои информации истиот е 1+1 година – односно втората не е задолжителна. Но, холандскиот тренер ги негира таквите тврдења.

Останува да се види дали Барса со Куман ќе освои некој од трофеите сезонава, во шпанскиот Суперкуп загуби во финалето. Во Лигата на шампионите е пред елиминација во осминафиналето (ПСЖ, 1:4), а во „Ла Лига“ заостанува пет бодови зад водечкиот Атлетико Мадрид.

Барсагејт: Бартомеу пуштен од притвор