Фудбалерите на Јувентус со убедлива победа против Сампдорија (3:0) ја започнаа одбраната на титулата во Серија А со успешно деби на новиот тренер Андреа Пирло.

„Старата дама“ вечерва ја оправда фаворитската улога, дојде во водство од 13 минута со голот на Швеѓанецот со македонско потекло, Дејан Кулушевски (1:0) кој исто така дебитираше во дресот на италијанскиот шампион.

На следниот гол во Торино се чекаше до 78 минута, во една мешаница најдобро се снајде дефанзивецот Леонардо Бонучи кој стрелаше од непосредна близина (2:0).

Во 88 минута конечниот епилог го постави Кристијано Роналдо после асистенцијата на Арон Ремзи. Правовремено беше пронајден португалскиот интернационалец, а овој искусно со удар по земја ја затресе мрежата на Аудеро.

„Старата дама“ во второто коло ќе гостува кај Рома, а екипата на Сампдорија првите бодови ќе ги брка на домашен терен против Беневенто.

Во текот на неделната програма Наполи на Елиф Елмас славеше кај Парма, потоа Горан Пандев ја стартуваше сезоната со убав гол во победата од 4:1 над Кротоне, а ремизираа Сасуоло и Каљари (1:1).