Кулинарски тајни што мора да ги знаете

Луѓето одамна дошле до некои заклучоци што науката дури сега ги објаснува. Така, многу тајни од бабината кујна ги заинтересирале нутриционистите, физичарите и молекуларните биолози, па денес тоа не се тајни, туку научно докажани факти

Денес општопознат факт е дека октоподот треба да се замрзне за да омекне, но малкумина знаат дека тоа има ист ефект како удирањето, кое се користи за истата цел. Во текот на замрзнувањето се создаваат кристали од мраз, кои со своите остри рабови делуваат како ножеви и го раскинуваат ткивото од месото, па така по одмрзнувањето, тоа е меко исто како да сте готвеле свеж октопод што претходно сте го „истепале“.

Кога се става месото во ладна, а кога во топла вода?

Ако сакате добра супа, месото треба да го ставите во ладна вода, додека за да се јаде варено, се става во топла вода. Како што млекото на топло се згрутчува, па добивате сирење, така и другите белковини, па и оние во месото, имаат способност да се згрутчат при загревање. Колку температурата е повисока, толку површинското згрутчување ќе биде побрзо и посилно. Значи ако го ставите месото во врела вода, ќе се згрутчи на површината, па сите корисни состојки ќе останат во внатрешноста на месото. Но, ако месото го ставите во ладна вода, корисните состојки ќе излезат од месото и ќе ја збогатат супата со нутриенти.

Затоа, ако сакате печеното месо да биде сочно, прво пропржете го на висока температура за да се затворат „порите“, односно да се згрутчат белковините и да остане сочноста во месото.

Кога да посолите пред, а кога по готвење?

Принципот на осмоза има голема врска со движењето на молекуларната течност низ полупропустлива мембрана. Во храната има многу течност која е заробена таму и до неа не може да се дојде по механички пат, но со осмоза може да се извлече течноста или да се задржи таму. Солта како материја растворлива во вода има голема улога во таквите процеси. На пример, така знаеме дека доматот содржи многу вода, иако на допир изгледа суво, па ќе го посолите и ќе го оставите неколку минути да се исцеди водата.

Значи, во зависност од тоа дали сакате да добиете сочно или крцкаво јадење, ќе го посолите пред или по готвењето. Така пржените компирчиња ќе ги посолите непосредно пред јадење. Неискусните готвачи ќе бидат горди на своите крцкаво пржени компирчиња, но ако ги посолат порано, а ги послужат по неколку минути, тие ќе станат меки.

Но сочноста може да се добие и со натопување во саламура, особено при готвење пилешко. Причина за тоа е што во прв момент солта ја извлекува водата од состојките, но подоцна како што ќе продира подлабоко, тој процес е обратен и водата се враќа назад, па тие стануваат посочни. Ако во текот на печењето го полевате месото со соковите од печењето, тоа ќе биде уште посочно и со крцкава коричка. Но, бидејќи многу сол не е здраво да се јаде, препорачливо е да користите маринада, која содржи други корисни состојки, а помалку сол. При нивно впивање во месото, тоа ќе стане сочно.

Млеко во кајгана, путер во омлет

Ако готвите кајгана, во јајцата додајте млеко, а во оние за омлет смрзнат путер. Липидите од млекото ќе се поврзат со белковините од јајцата, па доста течност ќе се задржи во нив. Тоа е добро за кајгана која треба да биде воздушеста. Додека за омлет тоа е премногу влага, бидејќи тој треба да биде компактен. Затоа додајте му ливчиња што поладен путер, кој при топење рамномерно ќе се измеша во смесата.

Семките од сусам треба да ги пропржите пред да ги користите бидејќи така вредните аминокиселини ќе се задржат во организмот. Покрај тоа освен што содржи здраво масло богато со витамини и антиоксиданси, сусамот всушност поради тие есенцијални аминокиселини се препорачува за вегетаријанци и за сите што сакаат здраво да се хранат. Ако го јадете со мешунки или со житарки, ќе го подобрите аминокиселинскиот состав на сусамот.

Почитуван читателу,

Нашиот пристап до веб содржините е бесплатен, затоа што веруваме во еднаквост при информирањето, без оглед дали некој може да плати или не. Затоа, за да продолжиме со нашата работа, бараме поддршка од нашата заедница на читатели со финансиско поддржување на Слободен печат. Станете член на Слободен печат за да ги помогнете капацитетите кои ќе ни овозможат долгорочна и квалитетна испорака на информации и ЗАЕДНО да обезбедиме слободен и независен глас кој ќе биде СЕКОГАШ НА СТРАНАТА НА НАРОДОТ.

ПОДДРЖЕТЕ ГО СЛОБОДЕН ПЕЧАТ.
СО ПОЧЕТНА СУМА ОД 60 ДЕНАРИ

Видео на денот