Кулеба вели дека знае од каде се испратени „крвавите пакети“ со животински очи во украинските амбасади
Украинскиот министер за надворешни работи Дмитро Кулеба денеска изјави дека сите сомнителни пакети испратени до украинските амбасади низ Европа дошле од застапништво на автомобилите „Тесла“ во Германија и обично биле испратени од пошти без видеонадзор.
„Вакви пакети добија 15 земји, во кампања на терор против украинските дипломати“, напиша Кулеба на социјалните мрежи.
Украина минатата недела соопшти дека „крвави пакети“ со животински очи биле испратени до неколку нејзини амбасади во Европа. Неколку дена претходно во украинската амбасада во Шпанија беше детонирано писмо-бомба.
„Сите пликови имаат иста адреса на испраќачот: салон за автомобили „Тесла“ во германскиот град Синделфинген. Вообичаено, пратката одела од пошти кои не биле опремени со системи за видео надзор“, напиша Кулеба и додаде дека „криминалците презеле мерки да не остават траги од нивната ДНК на пакетите“.
„Тој детал особено укажува на професионалното ниво на имплементација“, напиша шефот на украинската дипломатија.
Засега нема коментари од Берлин, ниту од раководството на компанијата за електрични автомобили.