Круемади: Со Рама како премиер, ЕУ е невозможна мисија

Лидерката на третата по големина политичка партија во Албанија, опозициското социјалистичко движење за интеграција (ЛСИ), Моника Круемади, обвини дека „со Еди Рама премиер Европската Унија е невозможна мисија за Албанците”.

Коментрајќи ја негативната одлука на Европскиот совет да не ги отвори преговорите на Албанија со ЕУ, таа додаде дека јасно кажала кои се пречките на европскиот пат на земјата.

– Но, за жал, Албанците и нивната европска иднина денес се заложник на еден човек, на Еди Рама кој го блокира европскиот пат. ЕУ кажа кои се конкретните пречки и кои се длабоките рани и критичните проблеми што денес ги отвори Еди Рама за Албанија. Единствената личност одговорна за оваа пречка на европскиот пат на Албанија е Еди Рама. Со Рама, ЕУ е невозможна мисија и неостварлив сон за Албанците. Неуспехот на Рама е индивидуален и личен затоа што тој избра да ја гради својата иднина со тоа што ќе ја уништи иднината на Албанците и да се збогати врз грбот на Албанците со тоа што ги осиромаши – обвини Круемади.

Таа побара оставка од премиерот како најмал одраз на неговата голема одговорност.

– Неговата оставка е најмал одраз на големата политичка одговорност која паѓа врз премиерот. Албанците успеаја да ја убедат Европа дека се дел од неа, дека ја сакаат Европа, дека бараат да живеат според нејзините стандарди – смета таа.

За Круемади, корупцијата и заробувањето на државата од Владата на Рама се сметки што Албанците ги плаќаат.

Рама вчера изјави дека не чувствува никаква вина, бидејќи „сите задачи Владата ги реализирала” и оти недобивањето датум за отпочнување преговори е последица на „кавгата меѓу големите”.

Тој отфрли можност за предвремени парламентарни избори.

Почитуван читателу,

Нашиот пристап до веб содржините е бесплатен, затоа што веруваме во еднаквост при информирањето, без оглед дали некој може да плати или не. Затоа, за да продолжиме со нашата работа, бараме поддршка од нашата заедница на читатели со финансиско поддржување на Слободен печат. Станете член на Слободен печат за да ги помогнете капацитетите кои ќе ни овозможат долгорочна и квалитетна испорака на информации и ЗАЕДНО да обезбедиме слободен и независен глас кој ќе биде СЕКОГАШ НА СТРАНАТА НА НАРОДОТ.

ПОДДРЖЕТЕ ГО СЛОБОДЕН ПЕЧАТ.
СО ПОЧЕТНА СУМА ОД 60 ДЕНАРИ

Видео на денот