Рускиот претседател Владимир Путин и германската канцеларка Ангела Меркел за време на телефонски разговор го истакнале значението на воведување на специјалниот статус на Донбас во украинските закони, соопшти Кремљ, а пренесе „Ал Џезира“.

Како што се наведува, двете страни го истакнале големото значение на целосна примена на Договорот од Минск и останатите договори за решение на украинскиот конфликт, пренесе Танјуг.

– Соговорниците ја потвторија посветеноста на понатамошната координација и напорите на Русија и Германија во рамките на Нормандиската четворка, вклучувајќи ги и подготовките за самит во тој формат – се наведува во соопштението.

Исто така, се додава дека Путин и Меркел детално ги разгледале прашањата во врска со решенијата за украинската криза, со посебен акцент на Штајнмаеровата формула, која ја потпишаа претставници на Киев, Донецк и Луганск во Контакт групата, пренесува агенцијата Тас.

Во соопштението пишува дека се зборувало и за условите за транзит на рускиот гас низ украинска територија, за што се водат трилатерални преговори меѓу Русија, Украина и Европската комисија.

– Во делот на разговорите посветени на Сирија, соговорниците го истакнале значењето за решавање на хуманитарните проблеми, вклучувајќи и враќање на бегалците во своите домови – се вели во соопштението на Кремљ.