Кралицата Елизабета и принцот Филип слават 73-годишнина од својот брак
Британската кралица Елизабета Втора и принцот Филип ја прославувааг својата 73-годишнина од бракот со сентиментален подарок – честитка од нивните правнуци.
Бакингемската палата објави специјална фотографија на кралицата Елизабета (94) и Филип (99) на која се гледа како радосно отвараат рачно направена картичка од принцот Џорџ, принцезата Шарлот и принцот Луис, децата на внукот на двојката, принцот Вилијам и неговата сопруга војвотката од Кембриџ Кејт.
На фотографијата кралските членови се насмевнати во замокот Виндзор и со многу љубов ја гледаат шарената картичка на која е врежан бројот 73 во чест на нивната годишнина.
Двајцата влечат потекло од кралицата Викторија, која владеела со тогашната огромна британска монархија во 19 век. И покрај кралската крв, тие растеле потполно различно, Елизабета во благосостојба, со дадилки и приватни учители, а Филип најчесто во беспарица.
Елизабетa имала само 21 година кога се омажила за потполковникот на Кралската морнарница Филип Маунтбатен во опатијата Вестминстер на 20 ноември 1947 година. На нивната венчавка биле присутни 2.000 гости. По венчавката кралскиот пар, по правилата на вишата класа во тоа време, живеел во одвоени соби.
За да се ожени со Елизабета, Филип морал да го прифати британското државјанство и да се откаже од врските со Германија. На венчавката не смеел да повика никој од германската страна на семејството, па дури ниту своите три сестри (сите три сестри на Филип биле омажени за германски нацисти).
Елизабета е кралица од 1952 година и владее подолго од кој било друг британски монарх. А нејзиниот брак со принцот Филип е исто така најдолгиот брак во историјата на кралството.
Додека кралицата Елизабета продолжува да ги извршува своите должности, принцот Филип (99) се повлече од јавниот живот.
Бидејќи Велика Британија е под национален карантин поради пандемијата на коронавирусот, тие се во самоизолација во замокот Виндзор.