Кралицата Елизабета ноќта ја поминала во болница, била подложена на испитувања
Британската кралица Елизабета Втора (95) поминала една ноќ во болница на прелиминарни медицински прегледи и во четвртокот на 21 октомври, се вратила во замокот Виндзор „во добро расположение“, објави Бакингемската палата.
Кралицата ја откажала посетата на Северна Ирска на 20 октомври, наведувајќи дека медицинскиот персонал ѝ рекол да се одмори, како и дека тоа не е поврзано со ковид-19.
„Следејќи го советите на лекарите да се одмори неколку дена, кралицата во средата попладне отиде во болница на прелиминарни истраги, а денеска во времето на ручек се врати во Виндзор со добро расположение“, се наведува во соопштението на палатата.
Извор од Бакингемската палата за Ројтерс изјавил дека кралицата останала во болницата од практични причини и дека нејзиниот медицински тим заземал претпазлив пристап, како и дека на 21 октомври попладне таа се вратила на своите обврски и извршила некои полесни обврски.
Кралицата Елизабета Втора е најстариот монарх во светот, а на тронот е речиси седум децении.