Премиерот Димитар Ковачевски вечерва телефонски разговарал со советникот на Стејт департментот, Дерек Шолет, во присуство на амбасадорката на САД, Кејт Мери Брнз, соопшти Владата.

Ковачевски, според соопштението, „изразил огромна благодарност до Стејт департментот и кажал дека високо ги цени поддршката и интересот за нашата земја во овие клучни моменти за државата“.

„Ковачевски го информираше советникот Шолет за процесот на широка консултација со сите чинители во општеството кој Владата најодговорно го почна веднаш по добивањето на европскиот предлог. Премиерот во разговорот уште еднаш ги потврди и посочи на јасните определби на Владата кои се темелат на демократските вредности и припадноста кон прогресивниот свет кои за нас, како што рече, немаат алтернатива, бидејќи тоа е единствениот пат кој води кон напредок и просперитет“, се вели во соопштението на Владата.