Во Загреб ги дознавме групите за следното Светско ракометно првенство кое ќе се одржи во Хрватска, Данска и Норвешка во периодот од 14 јануари до 2 февруари 2025 година.

Македонската сениорската машка репрезентација на извлекувањето беше сместена во третиот шешир, а за противници ги доби селекциите на Унгарија, Холандија и Гвинеја во групата „Д“.

Натпреварите ќе се играат во Вараждин, Хрватска, што е одлична можност за македонските навивачи да дојдат во што поголем број и ја дадат поддршката за избраниците на селекторот Кирил Лазаров.

Распоредот на натпреварите на нашите ракометари е следен:

15.01.2025 – МАКЕДОНИЈА – УНГАРИЈА
17.01.2025 – МАКЕДОНИЈА – ХОЛАНДИЈА
19.01.2025 – МАКЕДОНИЈА – ГВИНЕЈА

Најдобрите три репрезентации од секоја група ќе обезбедат пласман во главната фаза, додека четвртата репрезентација ќе биде дел од „Президент Куп“. Н

Нашата група „Д“ вкрстува со групата Ц во која се репрезентациите на Франција, Австрија, Катар и Кувајт.

Еден од оние кои придонесоа за пласманот на Македонија на Мундијалот беше и десното крило Никола Костески кој во бараж мечевите против Фарски Острови постигна севкупно осум голови. Беше втор стрелец (заедно со Марко Митев) со пет голови во првиот меч кој го загубивме со 34:27 во Торсхавн, а запиша три погодоци во големиот пресврт и победата од 34:26 во Скопје.

– Јас мислам дека треба да сме задоволни од ждрепката, имавме среќа да ни се падне Вараждин што беше многу важно за нас и за нашите навивачи. Групите секако не се лесни, и нашата група е исто така тешка, но јас се надевам дека ќе успееме да ја поминеме првата групна фаза. Очекувам во Вараждин голем број на македонски навивачи заедно сплотени за тоа што нè очекува и натпреварите против Унгарија, Холандија и Гвинеја – ни изјави македонскиот репрезентативец Никола Костески.

Ракометарите ќе играат во Вараждин: Мундијалот го отвораме против фаворитот Унгарија

Лазаров: Сите имаме добри спомени од Вараждин и се надевам дека повторно ќе биде така