Пред да влезам во партија имав поинкава слика за некои политичари, но сега кога имам шанса да поминам повеќе време со нив, сфаќам дека луѓето всушност не ги познаваат вистински, вели потпретседателот на СДСМ, Коста Петров во „Утрински брифинг“ на „Слободна ТВ“.

Потпретседателот на СДСМ, Коста Петров, вели дека доаѓа од приватниот сектор, ова е ново искуство за него.

-Она на што сум горд е што сум човек кој што не седи на страна, имам идеи и ги споделувам истите. Не сум човек ниту политичар кој што го осудува мислењето на другите, но идеата за подобро општество за сите е практично идеја за подобро утре за сите. Моето мото во живото е „Помогни онаму каде што можеш“. Тоа го направив во Министерството за здравство, помогнав и за Евровизија, и фала Богу имам стабилна фирма која што „растура“ низ светот и не работам за надомест. Јас сум човек кој што сака да седне и да си ја сработи работата. На тоа се фокусирам во моментов и сметам дека на луѓето им е доста и здосадено од дебати каде натпреварот е кој повеќе ќе се издере, но јас сум човек со план и визија. Ќе повторам – што повеќе луѓе, чесни луѓе да влезат во политиката- вели Петров.

Ние на ФБ и на Твитер, вели Петров, сите сакаме промена на општеството, но се создава еден систем каде што е табу, каде што е лошо да влезеш во политичка партија.

– Ако ние, луѓето како мене, младите, не влеземе во политика најпрво да ги промениме партиите па потоа политичкиот систем во државата, не може да очекуваме неаква промена. Ние сме оние што треба да го направиме. СДСМ е партија која што сфаќа дека секоја партија може и треба да се менува- вели Петров.

Околу почетокот на изборната кампања, Петров вели дека во фокусот на СДСМ е да направи изборна програма со граѓаните.

– Одржуваме трибини каде што предлозите ги делиме со надворешни експерти и граѓани и сметам дека како партија за прв пат ќе имаме изборна кампања која што ќе има долгорочна визија. Тоа значи иновативна економија, подобар квалитет на услугите. На луѓето им е преку глава од неизвесност. Имаме одлична и победничка кампања- рече во „Утрински брифинг“,  потпретседателот на СДСМ Коста Петров.