Косовскиот тим кој преговара со Србија, прогласен за неуставен
Косовскиот тим за преговори со Србија е прогласен за неуставен од страна на Уставниот суд на Косово.
Судот пресуди во корист на предметот поднесен од страна на две опозициски партии, Демократскиот сојуз на Косово и Движењето „Самоопределување“, со кое се оспорува за неуставен Законот за косовската делегација во преговорите со Србија, пренесува РСЕ.
Во соопштението за медиумите, меѓу другото, наведено е и дека Уставниот суд констатирал дека „Државната делегација, која е основана со оспорениот Закон, не е предвидена со Уставот и не е предвидена внатре во формата на владеењето и поделбата на власта”.
Во декември 2018 година, Косовското Собрание го усвои Косовскиот преговарачки тим, предводен од вицепремиерот Фатмир Лимај и лидерот на Социјалдемократската партија, Шпенд Ахмети.
Овој тим беше предвиден да функционира врз основа на Законот за надлежностите и одговорностите на Косовската делегација во преговорите со Србија, но кој беше оспорен од ДСК и Самоопределување, кои побараа од Уставниот суд толкување.
Веднаш по одлуката на Уставниот суд, ко-преговарачот на тимот, Ахмети, рече дека утре (петок) ќе поднесе оставка.