Косовската претседателка Вјоса Османи бара од Европската Унија „да биде погласна“ во однос на, како што ги нарекува, „дестабилизирачките тенденции на Србија во Косово и во регионот“ на Западен Балкан, јави дописникот на МИА од Приштина.

На денешната средба со амбасадорот на Австрија во Приштина, Кристоф Веидингер, Османи нагласила дека Косово е посветено на мирот и стабилноста во регионот.

Во соопштението од претседателскиот кабинет се вели дека на средбата се разговарало за последните случувања во северот на Косово, каде што пред десет дена имаше протести и блокади од страна на косовските Срби, поради одлуката на властите во Приштина за промена на српските регистерски таблички со косовски и реципроцитет кон Србија во однос на личните документи при влез од едната во другата држава.

„Претседателката Османи нагласи дека институциите на Косово се посветени на продолжувањето на целосната координација со меѓународните партнери, како што се координираа и досега. Претседателката Османи побара ЕУ да биде погласна во однос на дестабилизирачките тенденции на Србија во Косово и регионот“, се вели во сооштението.

Османи му рекла на амбасадорот Веидингер дека Косово очекува поддршка од Австрија во процесот на визна либерализација, како и за зачленување во меѓународни организации.