Косово се двоуми околу гасоводот, Владата уверува дека нашиот план не се менува
Македонските власти сметаат дека Косово се двоуми околу партнерското учество во енергетскиот мегапроект за гасна централа во Александрополис заедно со земјава, објави Алсат.
Двете земји пред неколку месеци потпишаа договор за физибилити студија за проектот, но сега, според извори од Владата, Приштина прави пресметки дали ќе ѝ се исплати да добива гас од кај нас. Што и да одлучи Косово – планот нема да пропадне, уверуваат властите.
„Тие прават анализа за економската исплатливост од гасификацијата, колку тоа би ги чинело, како таа инвестиција да им се врати и потоа како таа да се врати за добро на граѓаните и индустријата“, вели министерот за економија Крешник Бектеши.
Според вицепремиерот Фатмир Битиќи, инвестирањето во интерконекторот за гас од Грција не треба да се доведува во прашање.
„Градењето на интерконекторот со Грција, градењето на гасоводната мрежа во државата, е претходник на новиот енергенс на новата генерација гасоводната мрежа во државата, но и интерконекторите ќе бидат претходниците, како водородниот провод, којшто би требало да дојде наредните 30 години“, рече Битиќи.
Пред неколку месеци земјава потпиша договор за учество во гасната централа Александрополис со учество од 600 милиони евра. Инаку, главната дилема на Косово дали да инвестира во гасот е поради тоа што земјата има огромни резерви на јаглен.