Надлежен јавен обвинител од Основното јавно обвинителство за гонење на организиран криминал и корупција, денеска донесе одлука да започне истрага против косовски државјанин.

За него постои основано сомнение дека сторил кривично дело „криумчарење мигранти.

Осомничениот пеш ја поминал Македонско – косовската граница и по добиените насоки од непознато лице, го преземал патничкото моторно возило „форд транзит“ и тргнал по автопатот А1 во правец кон Гевгелија.

На непознато место пресретнал група мигранти кои претходниот ден илегално влегле во земјава, ги прифатил и тргнал во насока кон Скопје.

На знак да застане од страна на полициски мешовит тим, осомничениот продолжил со зголемена брзина и кај клучката кон село Смоквица го напуштил возилото со мигрантите и побегнал.

Полициските службеници во возилото пронашле 58 мигранти од Пакистан и Сирија, меѓу кои имало и седум малолетни лица.

Подоцна осомничениот е пронајден во близина на с. Миравци и лишен од слобода, велат од обвинителството. Ценејќи дека се исполнети условите, надлежен јавен обвинител до судија на претходна постапка достави предлог за определување на мерката притвор за осомничениот.

Судијата го прифати предлогот и на осомничениот му определи мерка притвор во траење од 30 дена.