Коронавирусот удри и по екипите, банкротира освојувач на ФА купот
Само четири недели откако добија нова управа, Виган прогласи банкрот.
Пандемијата на коронавирусот го донесе првиот случај на банкрот на клуб во Англија. Виган Атлетик само четири недели откако доби нови сопственици, конзорциум од Хонг Конг, денеска објави банкрот.
Во соопштението на англискиот клуб е наведено дека финансиската криза предизвикана од коронавирусот негативно влијаеше на работата на Виган и поради тоа беше неопходно да се именува стечаен управник. За нови менаџери на екипата се именувани Пол Стенли, Дин Вотсон и поранешниот претседател на Лидс, Џералд Краснер.
Англиската фудбалска лига (ЕФЛ) соопшти дека Виган ќе биде казнет со одземање на 12 бодови, што претставува автоматска суспензија за ваков случај.
Официјалната одлука ЕФЛ ќе ја донесе на крајот од сезоната кога ќе реши дали на Виган ќе му одземе бодови од оваа сезона или во наредната ќе почне со -12 бода на своето салдо, пренесува „Гардијан“.
Тимот моменто се наоѓа на 14. место во Чемпионшип и има осум бодови повеќе од екипите кои се наоѓаат во опасната зона.
Екипата на Виган најголемиот успех го постигна во 2013 година кога триумфира во ФА купот откако во финалето го совлада Манчестер сити, но во истата сезона испаднаа од Премиер лигата.