Извршниот директор на Твитер, Џек Дорси, конечно се огласи со одговор на едно од најчесто поставуваните прашања и барања на корисниците на оваа социјална мрежа. Имено, од самиот почеток на Твитер, корисниците бараат да им се овозможи опција за уредување на објавите, на што компанијата секогаш избегнуваше да одговори или се извинуваа со изговорот дека ја „разгледуваат идејата“, пишува српски „Телеграф“.

Дорси сега соопшти дека Твитер „веројатно никогаш“ нема да ја има можноста за уредување на објави, која на корисниците би им овозможила да ги поправат грешките во своите твитови.

Во интервју за магазинот „Wired“, во кое одговараше на прашањата на корисниците на Твитер, тој беше многу директен кога на ред дојде прашањето дали во 2020 година ќе биде овозможено уредување на објавите.

Одговорот е „не“, изјави Дорси, објаснувајќи дека иницијалната одлука била таа можност да не постои, бидејќи Твитер започнале да работат „како СМС, сервис за испраќање на пораки“ и сака да одржи до своите корени.

– Како што сите знаете, кога ќе испратите порака, не можете да ја повлечете. Ние сакаме да го зачуваме чувството кое го имавме во минатото – тврди тој.

Дорси признава дека многу работи се промениле од 2006 година и дека некои корисници имаат полно право да бараат можност за уредување на објавите, бидејќи поголемиот дел од нив сакаат да ги поправат грешките при пишување, а да не мораат да го избришат твитот со грешка и така да ги загубат сите лајкови и ретвитови.

Сепак, тој призна дека размислувале да ја овозможат оваа опција, само на една минута или 30 секунди од објавувањето на твитот, што е доволно време да се исправи печатна грешка или линк кој не работи. Меѓутоа, проблемот би се појавил во моментот кога корисниците би започнале да ја злоупотребуваат оваа можност, бидејќи корисникот би можел целосно да ја промени содржината на својот твит, нешто што оние кои го ретвитнале не би го знаеле.