Корекции на пензиите: Пензионерите од јануари со 185 денари повеќе на сметките
Пензионерите за јануари ќе добијат поголема пензија, по основ на усогласување со порастот на трошоците за живот, во номинална вредност за 185 денари на ниво на просечна пензија и 134 денари на ниво на најниска пензија, информираат од Министерството за труд и социјална политика (МТСП).
– Редовното законско усогласување на пензијата се врши два пати во годината од 1 јануари и 1 јули, според процентот на пораст на индексот на трошоците на живот, што обезбедува одржување на економската вредност и куповната моќ на пензијата. Почнувајќи од 2019 година, покрај редовното усогласување, се предвидува и дополнително усогласување, доколку бруто домашниот производ во претходната година има реален пораст повеќе од 4 отсто, се вели во соопштението од МТСП.
Покрај овие два начина на усогласување од 2020 година врз основа на одлука од страна на Владата на Република Северна Македонија може да се изврши уште едно дополнително усогласување во случај кога има пораст на минималната плата во тековната година за повеќе од 15 проценти и пораст на просечна плата во претходната година за повеќе од 5 проценти.