Копнена инвазија на Турција во Сирија: Најмалку осум загинати во првиот напад
Најмалку осум луѓе се убиени, а десетина се повредени во бомбардирање за време на првиот ден на турската воена операција на север во Сирија, информираа Сириските демократски сили (СДФ). Во меѓувреме, започна и копнена операција.
„Три борци и пет цивили се жртви. Десетина цивили се повредени поради масовно и неселективно турско гранатирање по сите погранични градови на североисток во Сирија“, објави на Твитер оперативниот центар СДФ, кој го предводат Курдите.
И Сириската опсерваторија за човекови права со седиште во Британија соопшти дека загинале осум лица, вклучувајќи и двајца христијански Асирци во градот Камишли, еден брачен пар со дете, како и маж во близина на градот Тал Абиад.
Како што пренесува Агенцијата АП, настрадало и едно дете во село западно од Камишил, како и еден маж во Рас ал Аина.
Денеска Турција продолжи со гранатирање на локации кои се под контрола на Курдите близу турската граница. Засега најжестоки напади се случуваат во градовите Рас ал Аин и Тел Абјад.
Претходно е соопштено и дека турските трупи и нивните сириски бунтовнички сојузници во средата влегле на североисток во Сирија, стои во соопштението на министерството за одбрана на Турција, со што почна копнената офанзива против борците на курдската полиција.
Порано турски воени авиони и артилерија ги гаѓале позициите на курдските борци во прекуграничната воена операција, само неколку дена откако американските трупи се повлекле од тоа подрачје.
Турското министерство за одбрана соопшти дека од порано нивните вооружени сили погодиле вкупно 181 цел во Сирија.